Միրզաբեկյանց եղբայրների շենքը Բաքվում

109

Պատմաբան, բանասեր Խաչատուր Դադայանի ՖԲ էջից, –

 7-հարկանի այս շենքը կառուցվել է 1908-1915 թթ. Նիկոլաևսկի փողոցի թ. 11 հասցեով (այժմ՝ Իսթիգլալիյաթ փող.), ճարտարապետն է Վարդան Սարգսյանը:

Սեփականատերերն էին ներկայիս Ադրբեջանի ծխախոտարդյունաբերության հիմնադիրներ Գևորգ և Միրզաջան Ռոստոմի Միրզաբեկյանցները (Егор и Мирзаджан Романовичи Мирзабекянцы): Նրանք ծնվել են Շամախի գավառի Նոր Շեն գյուղում, երիտասարդ հասակում տեղափոխվել Բաքու և 1873 թ. հիմնել «Գ. և Մ. Միրզաբեկյանց եղբայրներ» («Бр. Е. и М. Мирзабекянцы») ֆիրմայի ծխախոտի գործարանը Բոնդարնայա փողոցում:

1915 թ. ձեռնարկությունն արդեն արժանացել էր բազմաթիվ բարձրագույն պարգևների, և համբավը տարածվել էր Ռուսական կայսրությունով մեկ: Ֆիրման մասնաճյուղ ուներ Թիֆլիսում, մեծածախ պահեստներ՝ Աստրախանում, Աշգաբադում, Դերբենդում, Սամարղանդում, Կրասնովոդսկում, Շամախում: Արտադրանքը վաճառվում էր Կովկասի, Անդրկասպյան մարզի ու Թուրքեստանի երկրամասի բոլոր քաղաքներում, ինչպես նաև Վարշավայում, Օդեսայում ու մերձվոլգյան քաղաքներում:

Գևորգ Միրզաբեկյանցը ֆինանսական օժանդակություն է ցույց տվել Սաղիանի Սբ. Ստեփանոս վանքի նորոգմանը, 1877-ից սկսած 40 տարի եղել է Բաքվի Հայոց մարդասիրական ընկերության անփոփոխ անդամ: Բացի այդ, եղբայրները ֆիրմայի անունից ամեն տարի Սբ. Ծննդյան ու Զատկի տոներին դրամական նվիրատվություններ են կատարել Մարդասիրականին: