Ադրբեջանն ու Թուրքիան ոչ թե Զանգեզուրի միջանցքն են ուզում, այլ ամբողջ Սյունիքը

150

Թշնամին Հայաստանից Արցախի ականապատ տարածքների քարտեզն է ուզում։ Ռուսաստանի  արտգործնախարարը Բաքվում հայտարարել է՝ պետք է շուտափույթ Հայաստան վերադարձվեն հայ ռազմագերիները, իսկ Հայաստանը պետք է Բաքվին տա ականապատ տարածքների քարտեզը։ Ադրբեջանցի պաշտոնյան հայտարարել է, որ ռազմագերիների հարցն արդեն լուծվել է։ Մեր թշնամին առաջին պլան է բերել ականապատ տարածքների քարտեզը․ ուզում է այն րոպե առաջ ձեռքը վերցնել, որպեսզի լայն թափով շինարարություն սկսի Արցախի՝ իրեն անցած տարածքներում եւ բնակեցնի։ «Հենակետ» վերլուծական կենտրոնի ղեկավար, Արցախի նախկին նախագահի խորհրդական Տիգրան Աբրահամյանը Yerkir.am-ին մանրամասներ ներկայացրեց արտգործնախարարների հանդիպման, հայ-ադրբեջանական սահմանին տիրող վիճակի մասին։

«Ականապատ դաշտերի քարտեզը պահանջելը որեւէ կերպ ամրագրված չէ նոյեմբերի 9-ի ու հունվարի 11-ի հայտարարություններում, նույնիսկ եռակողմ հայտարարություններում չկար։ Լավրովի՝ տարածաշրջան վերջին այցի ընթացքում պարզ դարձավ, որ ներկայումս այն դարձել է նաեւ եռակողմ քննարկման օրակարգային հարց եւ քննարկվում է նույն հարթությունում այն հարցերի հետ, ինչպիսին, օրինակ, հայ ռազմագերիների, այլ պահվող անձանց կամ զոհվածների աճյունները վերադարձնելու հարցերն են»,- նշեց նա։

Տիգրան Աբրահամյանի խոսքով՝ սա անթույլատրելի է, որովհետեւ առանց պատերազմի Հայաստանը թշնամուն հանձնեց Քաշաթաղի, Ակնայի (Աղդամ), Քարվաճառի շրջանները, բայց Ադրբեջանը չի կատարում իր պարտավորությունները։ Ականապատ տարածքների քարտեզը խաղարկելու լավ հնարավորություն է՝ մեր շահերը տարբեր հարթություններում առաջ մղելու առումով, բայց ադրբեջանական կողմը փորձում է այդ խաղաքարտը չեզոքացնել, իր համար ցանկալիին հասնել՝ Հայաստանի առջեւ նոր խնդիրներ դնելով։  Թշնամին նաեւ խոշորացույցի տակ է պահում Սյունիքի, հատկապես՝ «Զանգեզուրի միջանցքի» հարցը։

«Ադրբեջանը մինչեւ հունիսի 20-ը՝ ԱԺ արտահերթ ընտրությունների օրը, ակնհայտորեն մեծացնելու է ճնշումները, ինչն առաջին հերթին պայմանավորված է նրա համար նախընտրելի իշխանության՝ Հայաստանում այս պահին դերակատարություն ունենալով, որովհետեւ ընտրություններում հիմնական ուժերը, որոնք հավակնում են անցնել իշխանության, այն ուժերն են, որոնց Ադրբեջանը շատ լավ ճանաչում է եւ հասկանում, որ իր համար  խնդիրներ են ստեղծվելու եւ՛ եղած գործընթացում, եւ՛ հետագայում։ Հայաստանի այսօրվա իշխանության վրա ադրբեջանցիները լծակներ ունեն, եւ նրանց մնալը ձեռնտու է։ Անկախ նրանից՝ ինչ գործընթացներ կլինեն, Ադրբեջանի եւ Թուրքիայի համար Սյունիքը չի դիտարկվում միայն միջանցք․ ճիշտ է՝ նոյեմբերի 9-ի փաստաթղթում նշված չէ «միջանցք» հասկացությունը, բայց սա շատ ավելի ընդգծում է Թուրքիայի եւ Ադրբեջանի տարածքային նկրտումները Սյունիքի նկատմամբ»,- նշեց Տիգրան Աբրահամյանը։

Ռազմական փորձագետի խոսքով՝ այն գործընթացները, որոնք թշնամու համար նախատեսել է այս իշխանությունը, արագանալու են մինչեւ հունիսի 20-ը։ «Տարածքային տեղաշարժերի մասին խոսելը դժվար է, քանի որ ընտրական շրջան է, եւ այս իշխանության հետ կապված ցանկացած ձախողում կամ տապալում եւս մեկ-երկու քայլով արագացնելու է նրանց հեռացումը իշխանությունից։ Այս պայմաններում բնական է, որ նրանք փորձելու են գործընթացները, որոնք ակտիվորեն ծավալվելու են, շատ ավելի խորքում իրականացնել եւ գոնե տեսանելի հարթակներում որեւէ տապալում ի ցույց չդնել»։

Հ․ Գ․ Հարցազրույցն անցկացվել է նախքան մայիսի 12-ի՝ հայ-ադրբեջանական սահմանին գրանցված միջադեպը։Մանրամասն՝ տեսանյութում