Արայիկ Հարությունյանը Կիչանում մասնակցել է Արմեն Բաղդասարյանի հիշատակին կանգնեցված խաչքարի օծման արարողությանը

66

Արցախի Հանրապետության նախագահ Արայիկ Հարությունյանը մայիսի 9-ին Մարտակերտի շրջանի Կիչան համայնքում մասնակցել է 2020թ. պատերազմի ժամանակ զոհված ազատամարտիկ Արմեն Բաղդասարյանի հիշատակին կանգնեցված խաչքարի օծման արարողությանը։

Ինչպես հայտնում են Արցախի Հանրապետության նախագահի աշխատակազմի տեղեկատվության գլխավոր վարչությունից՝ Նախագահը զոհվածի հարազատներին է փոխանցել Մարտական խաչ առաջին աստիճանի շքանշանը, որը հետմահու տրվել է «Կորնետ» հակատանկային համալիրի օպերատոր Արմեն Բաղդասարյանին՝ ցուցաբերած արիության ու դիպուկ խոցումների համար։ Ա. Հարությունյանն իր խոսքում ընդգծել է, որ մեր քրտնաջան աշխատանքով պարտավոր ենք շարունակել զոհված տղաների պայքարը՝ հասնելու համար մեր համազգային նպատակներին: