Շինթույլտվությունը տրվել է՝ ուզում եք երկնքով քայլեք, ուզում եք՝ գետնի տակով

61

Լենինգրադյան 23/11 հասցեին հարող տարածքում` դեպի խաչմերուկ տանող ճանապարհին, անմիջապես ճամփեզրին բնակելի նոր շենք կառուցվում՝ բնակիչներին զրկելով անգամ կանգառ գնալու հնարավորությունից։

«Փաստինֆո»-ն հարցմամբ դիմել էր Երևանի քաղաքապետարան՝ պարզելու, թե արդյոք շինարարության համար թույլտվություն տրամադրվե՞լ է քաղաքապետարանի կողմից, ինչին ի պատասխան հայտնել են, որ խոսքը Լենինգրադյան 19/9 հասցեում նախատեսված բազմաբնակարան շենքի մասին է, որի շինարարությունը մեկնարկային փուլում է: Տեղեկացնող ցուցանակը օրենքով սահմանված կարգով պետք է զետեղվի մինչև շինարարության բուն մեկնարկը:

Տեղեկացանք, որ նույն հասցեում բազմաբնակարան շենք է կառուցվելու՝ 5 վերգետնյա հարկով և մեկ մանսարդային հարկով: Կառուցապատողը ֆիզիկական անձինք են՝ Նորայր Գալստյան և Կարինե Սարգսյան, որոնք երկու տարվա ընթացքում պետք է ավարտեն շինարարությունը։ Նկատենք, որ ըստ քաղաքապետարանի տրվել է միայն 5 հարկանի շենքի կառուցման թույլտվություն, իսկ կառուցապատողը բնակիչներին ասել էր, թե կառուցվելու է նաեւ ստորգետնյա ավտոկայանատեղի, որի մուտքը լինելու է հենց 23/11 շենքի մոտից։

«Փաստինֆո»-ն դեռեւս 10 օր առաջ էր անդրադարձել շինարարությանը, նշել, որ տարածքում հողային աշխատանքներ են կատարվում՝ առանց իրազեկելու, այսօր արդեն լայն թափով կատարվում են հողային աշխատանքներ՝ տարածքի բնակիչների և, հատկապես, երեխաների համար ստեղծելով վտանգավոր իրավիճակ։ Բանն այն է, որ կառուցապատողները շինհրապարակը արգելապատնեշով կահավորել էին միայն ճամփեզրի հատվածից, իսկ բնակելի շենքի հարեւանությամբ, որտեղ նաեւ երեխաներ են խաղում՝ոչ։ Սակայն քաղաքապետարանը խնդիր չի տեսել ու մեր դիտարկմանը, թե արդյո՞ք քաղաքապետարանը պատրաստվո՞ւմ է տուգանել կառուցապատողին՝ շինարարությունը սահմանված կարգի խախտմամբ սկսելու համար, հայտնել են, որ շենքի բուն կառուցապատումը դեռ չի մեկնարկել, հետևաբար որևէ խախտման կամ տուգանքի մասին այս փուլում չի կարող խոսք գնալ:

Քաղաքապետարանից հավելել են՝ մինչև շինարարության մեկնարկը կառուցապատողը պարտավոր է ապահովել շինհրապարակի կազմակերպման համար անհրաժեշտ և գործող օրենսդրությամբ նախատեսված պայմանը, որը ենթադրում է նաև գիշերային լապտերներով կահավորված հետիոտնային ժամանակավոր անցում: Չապահովելու պարագայում կձեռնարկվեն վարչական պատասխանատվության միջոցներ: Նկատենք, որ ավելի քան 10 օր է, ինչ կառուցապատողն սկսել է աշխատանքների իրականացումը, սակայն հետիոտնային ժամանակավոր անցուղի չկա, էլ չենք խոսում լուսավորության մասին։

Հարցին`արդոք հարակից շենքի բնակիչների շահերը հաշվի առնվել են՝ շինթույլտվությունը տրամադրելիս՝ քաղաքապետարանից հայտնել են.

«Նախագիծն անցել է բազմակողմանի փորձաքննություն, և ստացել է դրական եզրակացություն: Դա նշանակում է, որ հաշվի են առնված օրենքով սահմանված չափորոշիչները, այդ թվում՝ հեռավորությունը հարակից շենքերից, բնակիչների անխոչընդոտ ելումուտը և այլն: Իսկ տեղեկացման առանձին կարգ հարակից շենքերի բնակիչների համար՝ չի գործում: Տեղեկատվությունը իրականացվում է շինհրապարակում ամրացված ցուցանակի միջոցով, որը փակցվում է բոլորի համար տեսանելի վայրում»։

Ավելի վաղ «Փաստինֆո»-ին հարակից շենքերի բնակիչները հայտնել էին, որ Լենինգրադյան 23/11 հասցեին հարող տարածքում որոշվել է կանաչ գոտու փոխարեն բնակելի շենք «խցկել»՝ անմիջապես ճամփեզրին։ Բնակիչները զրկվել են ոչ միայն անվտանգ երթևեկելու հնարավորությունից, այլ նաեւ՝ քայլելու, քանի որ դեպի կանգառ տանող ճանապարհահատվածում այլեւս չկա անգամ հետիոտնի համար նախատեսված արահետ։

Բնակիչները պատմեցին, որ մայթեզրի անհրաժեշտության մասին ահազանգել են նաեւ քաղաքապետարանի թեժ գիծ, որտեղից նախ եկել են տարածքը ուսումնասիրել, ապա լուծում առաջարկել այլ տարածքով կառուցել քայլուղի դեպի կանգառ, սակայն դրան էլ ընդդիմացել է «Բլից» ավտոլվացման կետի սեփականատերը՝ ասելով, որ այդ հատվածն էլ իր սեփականությունն է։ Ի վերջո` քաղաքապետարանը որոշել է ձեռքերը լվանալ՝ եւ բնակիչներին բազմաթիվ զանգերին ի պատասխան ասել են՝ շինթույլտվությունը տրվել է, բողոք ունեք՝ դիմեք դատարան։

Հ.Գ. Լուսանկարում պարզ երեւում է, որ կառուցապատողն աշխատանքներն սկսել է առանց անվտանգային պատշաճ միջոցներ ձեռնարկելու, մինչդեռ քաղաքապետարանը ոչ տեսնում, ոչ լսում է։ Հարեւանությամբ կայանված են բնակիչների մեքենաները, մյուս կողմում էլ խաղում են երեխաները։

Աղբյուր` Փաստինֆո