Ղարաբաղյան հակամարտության կարգավորման հիմքում ընկած է Արցախի ժողովրդի ինքնորոշման իրավունքը

279

ԱԳ նախարար Արա Այվազյանը փետրվարի 16-ին հանդիպել է  աշխատանքային այցով Հայաստան ժամանած Միացյալ Թագավորության արտաքին գործերի, համագործակցության եւ զարգացման նախարարության Եվրոպական հարեւանության եւ Ամերիկայի հարցերով նախարար Ուենդի Մորթընին եւ նրա գլխավորած պատվիրակությանը:

Ողջունելով հյուրերին՝ նախարար Այվազյանը նշել է,  որ այս այցը լավ հնարավորություն է՝ անդրադառնալու երկկողմ օրակարգին եւ ուրվագծելու այն հարստացնելուն ուղղված համատեղ քայլերը:

«Մենք բարձր ենք գնահատում Հայաստանի եւ Միացյալ Թագավորության միջեւ հաստատված փոխգործակցությունը եւ լիահույս ենք, որ կկարողանանք համատեղ ջանքերով նոր լիցք հաղորդել հայ-բրիտանական երկկողմ օրակարգին»:

Զրուցակիցները մտքեր են փոխանակել փոխադարձ հետաքրքրություն ներկայացնող ոլորտներում համագործակցության ընդլայնման հեռանկարների շուրջ՝ որպես առաջնային ուղղություններ առանձնացնելով տեղեկատվական տեխնոլոգիաների, ստեղծագործ կրթության, վերականգնվող էներգիայի, զբոսաշրջության ոլորտները:    

Հանդիպմանն անդրադարձ է կատարվել նաեւ տարածաշրջանային անվտանգության եւ կայունության հարցերի: Նախարար Այվազյանն այս առնչությամբ նշել է. «Մեր տարածաշրջանում ստեղծված ներկայիս իրավիճակը Թուրքիայի անմիջական ներգրավմամբ Ադրբեջանի կողմից ուժի կիրառման հետեւանք է: Ինչպես Դուք իրավացիորեն նշել եք նոյեմբերի 8-ին Համայնքների պալատում ունեցած ելույթում՝ այն չի կարող դիտարկվել որպես հակամարտության հանգուցալուծում. միայն բանակցված քաղաքական կարգավորումը, որը կհարգի բոլորի իրավունքները, ճանապարհ կհարթի պատերազմի պատճառների եւ հետեւանքների վերացման համար, կարող է կայունություն, տեւական խաղաղություն եւ ի վերջո՝ հաշտություն բերել Հարավային Կովկասի տարածաշրջան:

Ղարաբաղյան հակամարտության կարգավորման հիմքում ընկած է Արցախի ժողովրդի ինքնորոշման իրավունքը: Ադրբեջանի կողմից ինքնորոշման իրավունքի բռնի ճնշման փորձը, որն ուղեկցվել է պատերազմական հանցագործություններով, ոչ միայն մարդու իրավունքների խախտում է, այլեւ լուրջ եւ շարունակական սպառնալիք տարածաշրջանային անվտանգության համար»:

Արցախի դեմ ադրբեջանական ագրեսիայի հետեւանքով առաջացած հումանիտար հարցերի հասցեագրման համատեքստում ՀՀ ԱԳ նախարարը զրուցակցի ուշադրությունն է հրավիրել Ադրբեջանի կողմից հայ ռազմագերիների եւ քաղաքացիական անձանց, այդ թվում՝ կանանց, պատանդառության քաղաքականության վրա՝ նշելով, որ «դա մարտահրավեր է ոչ միայն Հայաստանի, այլեւ բոլոր նրանց համար, ովքեր արժանահավատորեն եւ հետեւողականորեն հանդես են գալիս միջազգային ասպարեզում մարդու իրավունքների  պաշտպանության դիրքերից»։