Վազգեն Մանուկյանն հանդիպել է մի խումբ համախոհների հետ

103

Վազգեն Մանուկյանն այսօր հանդիպել է մի խումբ համախոհների հետ, որոնց հետ քննարկել է Հայաստանում ստեղծված ներքաղաքական իրավիճակը, երկրի սոցիալ-տնտեսական, անվտանգային խնդիրները, տարածաշրջանի աշխարհաքաղաքական հնարավոր զարգացումները, Հայրենիքի փրկության շարժման գործունեությունը և այլ հարցեր։

Հանդիպմանը ներկա երիտասարդները բարձրացրել են մեր երկրում ազգային գաղափարախոսության ամրապնդման, ազգային իշխանությունների ձևավորման անհրաժեշտությունը, լսել Վազգեն Մանուկյանի տեսակետներն այդ հարցերի վերաբերյալ։

Մանուկյանի խոսքով՝ ազգային գաղափարախոսությունն ու ազատության գաղափարները իրար չեն հակասում, պարզապես պետք  է կարողանալ դրանք ճիշտ համադրել։ Երկրում ազգային և ժողովրդավարական արժեքներով քաղաքացի ձևավորելու գործում նա առաջին հերթին կարևորել է կրթական համակարգի դերը։

Հանդիպման մասնակիցները բարձրացրել են մեր երկրում ստեղծված իրավիճակում իշխանափոխության հրատապության հարցը, հետաքրքրվել Հայրենիքի փրկության շարժման ծրագրերի մասին և պատրաստակամություն հայտնել ակտիվորեն աջակցելու Շարժման գործունեությանը։

Վազգեն Մանուկյանը շեշտել է, որ Հայաստանում իշխանափոխության պահանջը քաղաքական պահանջ չէ, այլ պետականության պահպանման, երկրի անվտանգության ապահովման անհրաժեշտություն։