Թուրքիան Բայդենին կառաջարկի հանձնաժողով ստեղծել ՆԱՏՕ-ի ՀՕՊ–ի վրա Ս-400-ների ազդեցության ուսումնասիրման համար

109

Անկարան սպասում է, որ ԱՄՆ նոր նախագահը ստանձնի իր պարտականությունները: Այդ ժամանակ Թուրքիան Ջո Բայդենին կառաջարկի հանձնաժողով ստեղծել ՆԱՏՕ-ի հակաօդային պաշտպանության համակարգի վրա ռուսական Ս-400-ի ազդեցության ասպեկտներն ուսումնասիրելու համար: Ըստ թուրքական NTV հեռուստաալիքի՝ այս մասին լրագրողներին ասել է Թուրքիայի արտգործնախարար Մևլյութ Չավուշօղլուն Պակիստան կատարած ուղևորությունից վերադառնալուց հետո:

Անկարան կարծում է, որ նման հարթակը հնարավորություն կտա պահպանելու ինչպես Ս-400 համակարգերը, այնպես էլ վերադառնալու Ֆ-35 կործանիչ ինքնաթիռների ծրագրին:

Չավուշօղլուն նշել է, որ Թուրքիան անկեղծ ջանքեր է գործադրում Վաշինգտոնի հետ հարաբերությունները բարելավելու ուղղությամբ և նույն վերաբերմունքն է ակնկալում ամերիկյան կողմից:

Անցյալ ամիս, կապված ռուսական Ս-400 հակաօդային պաշտպանության համակարգերի մատակարարման հետ, Վաշինգտոնը պատժամիջոցներ կիրառեց Թուրքիայի դեմ, ինչպես նաև բացառեց Ֆ-35 կործանիչների ծրագրից: Անկարան այս քայլը որակեց «լուրջ սխալ»: