Վերջին ամիսներին արցախահայության գլխին այնքան խաղեր խաղացին, որ հիմա դժվար է որևէ ակնկալիք ունենալ. Վահրամ Բալայան

153

Արցախի Հանրապետության ԱԺ Արտաքին հարաբերությունների մշտական հանձնաժողովի նախագահ, ՀՅԴ Արցախի Կենտրոնական կոմիտեի անդամ Վահրամ Բալայանի խոսքով՝ Մոսկվայում Հայաստանի, Ռուսաստանի ու Ադրբեջանի ղեկավարների հանդիպումից ընդհանուր առմամբ ակնկալիքներ չունի։

«Վերջին ամիսներին արցախահայության գլխին այնքան խաղեր խաղացին, որ հիմա դժվար է որևէ ակնկալիք ունենալ, թե ինչ կլինի ու ինչպես կլինի։ Սակայն, որպես ցանկություն, պետք է ասեմ, որ ցանկալի կլինի, որ հանդիպմանը քննարկվեն անվտանգության հետ կապված հարցերը, ի վերջո, Արցախի կարգավիճակի հարցը, որն ուղղակիորեն կապված է անվտանգության հետ։ Նաև՝ փախստականների վերադարձի հետ կապված հարցերը, մասնավորապես՝ խոսքը Հադրութի, Ասկերանի, Մարտունու շրջանի այն գյուղերի մասին է, որոնք ագրեսիայի հետևանքով անցել են հակառակորդին։ Կցանկանայի՝ նաև քննարկվեր Հայաստանի սահմանների հետ կապված հարցերը, այսօր Սյունիքը ծանր վիճակի մեջ է, Վարդենիսը՝ նույնպես։ Մոտավորապես այս հարցերը պետք է քննարկվի հանդիպման ժամանակ»,- 168.am-ի հետ զրույցում ասաց Վահրամ Բալայանը։

«Մենք չպետք է իրականությունից կտրվենք, Ռուսաստանի խոսքը վճռական է, հուսով ենք, որ, վերջիվերջո, ՌԴ ղեկավարն այնպիսի հարցեր կներկայացնի, որը հնարավորություն կտա, որպեսզի արցախահայության անվտանգության հետ կապված հարցերը լուծվի և ընդհանրապես տարածաշրջանի խաղաղությունը պահելու տեսանկյունից ավելի նոր երաշխիքներ կստեղծվի։ Պետք է նկատել, որ, վերջիվերջո, Արցախը շուրջ 350 տարի Ռուսաստանի հետ ունեցել է քաղաքական հարաբերություններ, և կարծում եմ՝ այդ հարաբերությունները հետագիծ թողած կլինեն։ Չեմ կարծում, որ ՌԴ-ն այդ ամենը հաշվի չի առնի։ Ըստ էության, արցախյան կողմը՝ որպես ռուս ժողովրդի բարեկամ ու դաշնակից, միշտ բարձր մակարդակով է կատարել իր պարտականությունները։ Ըստ իս, երկկողմանի շահավետ կլինի այդ հարաբերություններին նոր լիցք հաղորդել, ամեն դեպքում, դրանից երկու կողմն էլ կշահեն»,- եզրափակեց Վահրամ Բալայանը։

Ըստ Վահրամ Բալայանի, ԵԱՀԿ Մինսկի խմբի գործունեությունը պետք է շարունակվի, բայց այն պետք է ավելի գործնական հունի վրա դրվի, քանի որ որոշակի հակակշռություն պահելու հնարավորություն ունի։ Այն ներկայացնում են տարբեր երկրներ, որոնք ներկայացնում են տարբեր աշխարհաքաղաքական շահեր։ Հետևաբար՝ այս տեսանկյունից, ցանկալի կլիներ, որ Մինսկի խմբի ձևաչափը շարունակեր մնալ։