Վ․ Բրյուսովի անվան պետական համալսարանի 130 դասախոս և աշխատակից պահանջում է Նիկոլ Փաշինյանի հրաժարականը

191

Վ․ Բրյուսովի անվան պետական համալսարանի մի շարք դասախոսներ եւ աշխատակիցներ հայտարարություն են տարածել, որով միանում են Նիկոլ Փաշինյանի հրաժարականի պահանջին։ Հայտարարությունում ասվում է․

«Մենք՝ Վ. Բրյուսովի անվան պետական համալսարանի ներքոստորագրյալ դասախոսներս եւ աշխատակիցներս, միանում ենք ՀՀ վարչապետ Նիկոլ Փաշինյանի ու Կառավարության հրաժարականի հանրային պահանջին եւ առաջարկում ենք անցկացնել արտահերթ խորհրդարանական ընտրություններ:

Այսօր, երբ մեր հայրենիքը 2020թ. նոյեմբերի 9-ին ստորագրված հայտարարության արդյունքում հայտնվել է աննախադեպ մարտահրավերների առջեւ, որոնք ներկա իշխանությունը ի զորու չէ հաղթահարել, մենք ակնկալում ենք սահմանադրական ճանապարհով հնարավորինս արագ ձեւավորել արհեստավարժներից կազմված կառավարություն, որը

կկանխի պետականության փլուզումը եւ կվերականգնի մեր ոտնահարված ազգային արժանապատվությունը

կապահովի Հայաստանի եւ Արցախի Հանրապետությունների անվտանգությունը եւ պետական սահմանների անձեռնմխելիությունը

հրատապ կլուծի անհայտ կորած, գերեվարված զինվորների եւ քաղաքացիների խնդիրները

կկազմակերպի պատշաճ աջակցություն պատերազմի արդյունքում տուժած ընտանիքներին եւ վտանգված համայնքներին

կվերականգնի երկրի դիվանագիտական հարաբերությունները եւ միջազգային համբավը

կկասեցնի մոտալուտ ֆինանսական ճգնաժամը եւ ոտքի կկանգնեցնի կաթվածահար եղած տնտեսությունը։

Մենք՝ բարձրագույն ուսումնական հաստատության ներկայացուցիչներս, պատասխանատու ենք ազգասեր եւ հայրենասեր սերունդ կրթելու հարցում ու չենք կարող անտարբեր լինել երկրում ծավալված քաղաքական իրավիճակի եւ բարոյական մթնոլորտի պայմաններում»: