Հերոսները լինում են ոչ միայն գրքերում, այլև հենց այստեղ են, մեր կողքին. Փաշինյան

66

ՀՀ վարչապետ Նիկոլ Փաշինյանը Սարդարապատի հուշահամալիրում ընթացող պարգևատրման արարողությունը բացառիկ է համարում նրանով, որ Տավուշյան մարտերի մասնակիցներ անձամբ են ստանում իրենց շքանշանները, իսկ պատմության մեջ առաջին անգամ ՀՀ Ազգային հերոսի կոչումը շնորհվում է գործող զինծառայողի: «Արմենպրես»-ի փոխանցմամբ՝ այս մասին Փաշինյանն ասաց օգոստոսի 28-ին ընթացող միջոցառման ընթացքում:

«Սարդարապատի հերոսամարտի հուշահամալիրում, որն Օսմանյան բանակի նկատմամբ հայ ժողովրդի տարած փառապանծ հաղթնակի խորհրդանիշն է, հավաքվել ենք բացառիկ առիթով: Բացառիկ է նրանով, որ միանգամից 16 զինծառայողներ կպարգևատրվեն «Մարտական խաչ» առաջին աստիճանի, 55 զինծառայողներ՝ «Մարտական խաչ» երկրորդ աստիճանի շքանշանով, բացառիկ է նրանով, որ պարգևատրվողներից 24-ը ներկա են և պարգևներն անձամբ նրանց հանձնելու պատիվն եմ վայելելու, մյուս պարգևատրվածներն այս պահին էլ իրականացնում են ՀՀ սահմաններն ու անվտանգությունը պաշտպանելու իրենց ծառայությունը: Այս օրը բացառիկ է նաև նրանով, որ ՀՀ պատմության մեջ առաջին անգամ գործող զինծառայողն արժանանում է ՀՀ Ազգային հերոսի կոչման: Ազգային հերոսի կոչումը հավաստող Հայրենիքի շքանշանը կհանձնեմ հայոց բանակի կապիտան Ռուբեն Սանամյանին, իսկ վաղը նա սովորականի նման իր ծառայությունը կիրականացնի իր զորամասում»,- ասաց Փաշինյանը:

Վարչապետն ընդգծեց, որ պատմության մեջ առաջին անգամ է, որ Հայաստանի ազգային հերոսի շքանշանը սպան ստանալու է անձամբ, և այդ իրադարձությունը վկայությունն է այն բանի, որ ազատամարտի հերոսների գործը կենդանի է, այն ոչ միայն պատմություն է, այլև այսօրվա և վաղվա չընդհատվող իրադարձություն:

«Այսօրվա մեր պարգևատրվածներն ու Ազգային հերոսը մեր լեգենդար հերոսների մարմնացումն են, նրանց ֆիզիկական ներկայությունը մեր այսօրվա կյանքում: Հերոսները լինում են ոչ միայն գրքերում, այլև հենց այստեղ են, մեր կողքին, նրանք ապրում են մեզ հետ, նույն շենքում, քաղաքում, գյուղում, նրանք հերոսացել են, ուրեմն մեզնից յուրաքանչյուրը կարող է, և մեր պարտքն է հերոսանալ ամեն օր և ամենուր»,- նշեց վարչապետը:

ՀՀ նախագահի օգոստոսի 18-ի հրամանագրով կապիտան Ռուբեն Սանամյանը պարգևատրվել է Հայրենիքի շքանշանով՝ արժանանալով Հայաստանի ազգային հերոսի բարձրագույն կոչմանը:

Կապիտան Ռ.Սանամյանը, որպես սպա և հրամանատար, հայրենիքի պաշտպանության ու անվտանգության ապահովման գործում ցուցաբերել է բացառիկ արիություն, անձնուրացություն և խիզախություն։ Կապիտան Սանամյանը հմտորեն ղեկավարել է հատուկ հետախուզական միջոցառումներ իրականացնող խմբի անձնակազմը՝ անձնական օրինակով քաջալերելով զինծառայողներին, առաջադրելով անհատական խնդիրներ, կազմակերպելով «ԱՆՎԱԽ» մարտական դիրքի ուղղությամբ հակառակորդի բազմակի գրոհների կասեցումը, նրա կենդանի ուժին, սպառազինությանն ու ռազմական տեխնիկային հասցնելով զգալի կորուստներ:

Չխնայելով սեփական կյանքը, Սանամյանը խմբի մարտիկների հետ միասին դիրքի մատույցներում իրականացրել է բարդ ու վտանգավոր ինժեներական աշխատանքներ, հետախուզմամբ հայթայթել արժեքավոր փաստաթղթեր, զենք, զինամթերք, մի շարք տեխնիկական միջոցներ և այլ տվյալներ: Որպես հրամանատար՝ կապիտան Սանամյանը ճշգրիտ է վերլուծել հակառակորդի գործողությունները, գնահատել իրադրությունը, նախորոշել հնարավոր զարգացումները և դիրքի անձնակազմի հետ համատեղ ջանքերով անառիկ պահել «Անվախ» մարտական դիրքը:

Ռուբեն Ռազմիկի Սանամյանը ծնվել է 1976թ. սեպտեմբերի 22-ին, Տավուշի մարզի ք. Դիլիջանում: 1995-1997թթ. անցել է պարտադիր ժամկետային զինվորական ծառայություն ՊԲ առաջնագծի զորամասերից մեկում: 2006թ. անցել է պայմանագրային զինվորական ծառայության: Ամուսնացած է. ունի երկու երեխա: 2012 թ-ին Ռ Սանամյանը պարգևատրվել է «Մարտական խաչ» 2-րդ աստիճանի շքանշանով։

Ադրբեջանի զինված ուժերի զինծառայողները հուլիսի 12-ին՝ժամը 12:30-ի սահմաններում, ՈՒԱԶ մակնիշի ավտոմեքենայով Տավուշի ուղղությամբ ՀՀ պետական սահմանը խախտելու փորձ էին կատարել: Հայկական կողմի նախազգուշացումից հետո Ադրբեջանի զինծառայողները, թողնելով ՈՒԱԶ մակնիշի ավտոմեքենան, վերադարձել էին իրենց դիրք: Ժամը 13:45-ին Ադրբեջանի զինված ուժերի զինծառայողները կրկնել էին հայկական զինված ուժերի սահմանային դիրքը գրավելու փորձը՝ կիրառելով հրետանային կրակ, սակայն ճնշվել էին հայկական կողմից և, կորուստներ կրելով, ետ շպրտվել: Ավելի ուշ ադրբեջանական կողմը վերսկսել էր հրետակոծությունը՝ թիրախավորելով քաղաքացիական ենթակառուցվածքներ: Հուլիսի 21-ին, ժամը 22:30-ին «Անվախ» դիրքի ուղղությամբ հակառակորդի հատուկ նշանակության ստորաբաժանումը ձեռնարկել է հերթական հարձակումը: Հայկական ԶՈւ ստորաբաժանումը հետ է մղել հակառակորդի գրոհը` պատճառելով զգալի կորուստներ: