Հայոց լեզուն, Հայ Առաքելական Եկեղեցին, ընտանիքը նախևառաջ սահմանադրաիրավական արժեք ունեն. դրանց պաշտպանության համար պետությունը քայլեր պետք է ձեռնարկի. Գևորգ Դանիելյան

57

Շատ հաճախ դատողություններ ենք անում հայոց լեզվի, Հայ Առաքելական Եկեղեցու կարգավիճակի, ընտանեկան արժեքների մասին, բայց դրանք դիտարկում ենք զուտ նպատակահարմարության տեսանկյունից՝ անտեսելով, որ դրանք նախևառաջ սահմանադրաիրավական արժեք ունեն, և պետությունը պարտավոր է այս առնչությամբ կոնկրետ քայլեր ձեռնարկել:

Այս մասին «Ազգային արժեքների պաշտպանություն» նախաձեռնության համակարգող խմբի ասուլիսին հայտարարեց նախաձեռնության անդամ, իրավաբանական գիտությունների դոկտոր, պրոֆեսոր, Գևորգ Դանիելյանը՝ անդրադառնալով եկեղեցու, հայոց լեզվի, մշակութային ժառանգության, ընտանիքի և մանկության պաշտպանության հիմունքների վերաբերյալ օրենքի նախագիծ ընդունելու համար ստորագրահավաքի կազմակերպմանը:

Նա նշեց, որ երբ պետության կողմից համապատասխան քայլերը ձեռնարկված կլինեն, ընդամենը կառաջանա գնահատական տալու խնդիր, ոչ թե նպատակահարմարության կամ արդյունավետության տեսանկյունից դատողություններ անելու անհրաժեշտություն:

Նրա խոսքով՝ թեև առայժմ չեն կարող նախաձեռնել հանրաքվեի իրավական ռեժիմով գործընթաց, բայց առաջին իսկ հնարավորության դեպքում այդպիսի փորձ արվելու է, իսկ այժմ ձեռնարկած գործողություններում որևէ քաղաքական շահի սպասարկում փնտրելն անիմաստ է:

«Այն արժեքները, որոնց պաշտպանության համար մենք այս կամ այն չափով արտահայտվում ենք, սահմանադրաիրավական արժեք ունեն, և Սահմանադրության երկրորդ գլխով, որը վերաբերում է մարդու իրավունքներին և ազատություններին. մենք ոչնչի չենք կարող հասնել, եթե սահմանադրական կարգի հիմունքները պատշաճ կարգով պաշտպանված չլինեն»,-ասաց նա՝ նշելով, թե ստորագրահավաքը նախաձեռնել են, քանի որ կա մտահոգություն:

«Եթե չլիներ, մենք կշարունակեինք պարզապես հանրային քննարկումների հարթությամբ հակադարձել և ներկայացնել մեր դիրքորոշումները, բայց երբ տեսնում ենք, որ այդ հանրային քննարկումներն այն ընդգրկվածությունը չունեն, և հաճախ էլ մեր դիրքորոշումները չեն ունենում այն արձագանքը, որը, որպես կանոն, պետք է լինի, այսքանն ուղակի անհրաժեշտություն է»,-նշեց Դանիելյանը:

Դիտարկմանը, թե ժամանակակից աշխարհում գլոբալիզացիայից խուսափել չի ստացվում, և արդյո՞ք նախաձեռնությունը չի  դառնա ազգին ինքնամեկուսացնելու պատճառ, Դանիելյանն արձագանքեց, որ երբ փորձում են արժեհամակարգի պաշտպանության քայլեր ձեռնարկել, հաճախ տպավորություն է ստեղծվում, որ միգուցե դա դրական է, բայց մի օր կարող է հանգեցնել պետության մեկուսացմանը՝ դրանից բխող բոլոր բացասական հետևանքներով հանդերձ, բայց իրականությունն այլ է:

«Օրինակ՝ Եվրամիության երկրներ կան, որոնք Ստամբուլյան, Լանզարոտեի կոնվենցիաները չեն վավերացրել: Երկրներ կան, աստիճանաբար հետընթաց են արձանագրում: Այսինքն՝ միանշանակ ասել, որ զարգացումները գնում են գլոբալիզացման՝ այն տեսակով, որը հաճախ հրամցնում ենք հանրությանը, այդպես չէ: Վավերացնող երկրներն էլ բոլորովին այլ մոտեցումներով ու չափանիշներով են կիրառում այդ կոնվենցիաները»,-նշեց նա:

Դանիելյանի խոսքով՝ թեև հայտարարվում է, որ ընտանիքի կոնցեպտին ընդհանրապես «ձեռք չեն տալիս», բայց դա ընդամենը պարզունակ հայտարարություն է:

«Միևնույն է՝ ակնկալում են, որ համասեռամոլներին պետք է ընտանիքի անդամի կարգավիճակին հավասարեցված կարգավիճակ տրվի, և թույլ տան նաև երեխաներ որդեգրել՝ ասելով, որ խտրականության արգելքի սկզբունքը սա է թելադրում: Մենք արտոնություն ենք վերապահում մարդկանց, որոնք ընտրել են մի ճանապարհ, որին ո´չ դեմ ենք արտահայտվում, ո´չ քարոզում ենք, ասում ենք՝ մի վերապահեք արտոնություններ: Եթե համասեռամոլին թույլ են տալիս երեխա որդեգրել, կամ նախատեսում են, որ կարող է այդպիսի բան լինել, ուրեմն՝ դեմ են գնում երեխայի լավագույն իրավունքներին, որովհետև Սահմանադրությունը երեխայի իրավունքների լավագույն շահերը համարում է գերակայող: Եթե առաջանում է կոնֆլիկտ չափահաս քաղաքացու և երեխայի միջև, ապա պետք է գերակայեն երեխայի իրավունքները»,-ասաց Գևորգ Դանիելյանը:

Աղբյուր՝ Tert.am